Audiotur En Tour duerch d'Chamber

Häerzlech wëllkomm an der Chamber, am Zentrum vun der Lëtzebuerger Demokratie! Do, wou Politik gemaach gëtt. Do, wou Gesetzer entstinn. Do, wou déi Regelen décidéiert ginn, un déi mer eis all mussen halen.

Mir proposéieren Iech e klengen Tour duerch déi éischt Institutioun am Land. Dir kritt Erklärungen iwwer hir Roll, hire Funktionement, hir Geschicht an hiert Gebai. Déi Informatioune kënnt Der liesen oder lauschteren. Op eenzelne Statioune ginn et zousätzlech Explikatiounen a kuerze Videoen.
En éischte Stopp proposéiere mer Iech am Hall vum „Hôtel de la Chambre des Députés“, do, wou scho munch prominente Politiker sech an d’gëllent Buch vun der Chamber agedroen huet.