Museum Гэр бүлын дурасхаал. Дайнhаа ерэhэн бэшэгүүд

Сультимов Цыбикжаб Гылыкович 1925 ондо Загарайн аймагай Шулуутай нютагта  түрэhэн. Хара-Шэбэрэй долоон жэлэй hургуули дүүргээ. Бага наhанhаань Цыбикжаб Гылыкович уран хурса үгэдэ дуратай, арадай аман зохёолоор hонирходог, суглуулдаг, уран гуурhанай хурсые эдир наhандаа туршажа эхилhэн. Yнэгэтэйн арбан жэлэй hургуулида hурахадаа, буряадай мэдээжэ уран зохёолшо Дамба Жалсараевтай сугтаа hураhан юм, нүхэд боложо, саашадаа Дамба Зодбич  зохёохы замдань ехэ туhа хүргэhэн юм.

1943 ондо хатуу сагай эрхэ байдалаар эдэ нүхэд сэрэгэй албанда татагдаа, Цыбикжаб Гылыкович Эхэ ороноо хамгаалхаяа баруун фронт мордожо, Белорусска 3-дахи фронтдо 97-дохи стрелково дивизидэ дайшалхы намтараа эхилээ.  Смоленск, Белорусси, Кёнигсберг хотонуудта гал дүлэтэ байлдаануудта хабаадалсаа. 1944 оной февраль hарада хүндɵɵр хүл руугаа шархатаhан байна. «Кенигсберг сүлɵɵлhэнэй түлɵɵ» гэhэн медаляар, ойн баярай медальнуудаар шагнагдаhан.

1947 ондо сэрэгэй албанhаа сүлɵɵлэгдэжэ, нютагаа бусажа, түрэл колхоздоо счетоводоор ажаллаа. 1949 онhоо Хара-Шэбэрэй hургуулида багшаар хүдэлжэ эхилээ.

          1954 ондо Д. Банзаровай нэрэмжэтэ БГПИ-гэй түүхын факультет дүүргээ. 1956 онhоо 1986 он болотор Асагадай дунда hургуулида буряад хэлэ болон литературын багшаар ажаллаhан намтартай. Багшын ажалай ветеран.

Буряад АССР-эй уран зохёолшодой холбооной гэшүүн. «Буряад үнэн» сониндо, суглуубаринууд соо олон шүлэгүүдынь, хɵɵрɵɵнүүдынь, зүжэгүүдынь хэблэгдэhэн.

 2025 оной ноябриин 15 манай багшын Сультимов Цыбикжап Гылыковичай 100 жэлэй ойн баяр тэмдэглэдэхэ. Энэ баярта зорюулагдажа, багшын хүбүүн Сультимов Элбэк-Доржо Цыбикжапович, манай буряад хэлэнэй багша Нанзанова Очир-Ханда Найдановна хоёр эсэгынгээ, багшынгаа дайнhаа ерэhэн бэшэгүүдые, дайнда ябахадаа бэшэhэн дневнигүүдые, ахынь бэшэгүүдые ном болгон гаргажа байна.