Audio tour Suus camins d'Anglet

Durada aproximativa : 2 h
Tèxtes : Miquèu Baris
Partenariat : IEO, IEO 40, Camille Jautrou (Servici civic, IEO-FFCU)

Visita disponibla en français e en occitan (gascon).

Endé nos har saber çò que pensatz de la visita,empleatz lo nòste questionari de satisfaccion.

Endé se parcar : Que'vs conselham lo parcatge principau proishe d'Ador, sus las allèas Marinas. Un còp la purmèra partida de la visita acabada (anar/tornar de cap a l'arriu l’Haritçague), que'vs conselham de reprochar la vòsta veitura deu Parc Maharin (e atau, de minimizar lo temps de passejada per se'n tornar a la veitura).

----

Enqüèra un barri d’Anglet qui a pro cambiat dab lo temps : los Pontòts e lo son arriu emblematic, Haritçaga. Uei que diserén un arriu de las lordèras qui’s geta dens Ador au pont de l’Avugle. Mes ne’s cau pas hidar a l’aparéncia d’adara ! Que serveish de termièra entre Baiona e Anglet e que traversa de cap a la fin deu son cors la zòna comerciau deus Pontòts, celèbre adès preus sons pishorrèrs e erbacèrs, vantats un còp èra preu Pèir Rectoran qui a sabut guardar dens lo son Diccionari deu Gascon Maritime lo nom gascon de totas las plantas cotivadas. Mercés ad eth !

Qu’evocaram tanben l’un deus fondators dab eth de l’Academia Gascona a Anglet, lo Carlito Oiarsun, e que vederam lo famós pont de l’Avugle, e perqué a l’aperan enqüèra atau.

Enfin, que vederam, a l'entorn deu Parc deu Maharin, un chic de la vegetacion deu parçan : los casses, qui s’an balhat lo son nom basca a l’arriu Haritçaga, los verns o arbes deus esclopèrs, qui ne hasèn los esclòps solide, mes tanben las bolas tà descanilhar las quilhas de tres. Que parlaram tanben d’ua planta qui existiva dejà sus tèrra a l’èra primaria, lo pinoet, planta medicinau mes tanben tà rénder servici a l’òmi… tà hrobir e netejar las caishòlas d’estam !

E las bèstias, ne las desbrombaram pas : los amfibis, l’espècia la mei miaçada de l’umanitat, com los cabòç de chòts, los sapos, las grolhas e los carrècs… E enfin tota la varietat de damisèlas o de vailets de sèrp, dens ua mesclanha de colors de s’i pèrder…

Los tèxtes que son legits preu Miquèu Baris

Pr'amor de la longor potenciau de la visita, que'vs preconizam de har la visita en bicicleta, o de pè en tot desplaçar la veitura de las Aleas Marinas au Parc deu Maharin.

(C) IEO - Tots drets reservats / Tous droits réservés