Audiotour Suus camins deu petit Baiona

Durada : entre 50 min e 1h30
Tèxtes e lectura preu : Miquèu Baris
Credit fotografic: Miquèu Baris et André Lajeus.
Colleccion de cartas postaus ancianas deu Lionel Andia.
Un partenariat : IEO, IEO 40, Camille Jautrou (Servici civic, IEO-FFCU).

Visita possibla en francés e en occitan (gascon).
Endé nos har saber çò que pensatz de la visita,empleatz lo nòste questionari de satisfaccion.

E en avant per ua passejada dens Baiona, entre Niva e Ador aqueste còp, a la descobèrta deus camins d’aqueth Petit Baiona tan car au còr deus poètas gascons, lo Pèir Lescar e lo Justin Larrevath, e tanben deu Basco Augustin Xaho, un militant e polemista liberau deu sègle XIXau qui’s publiquè entre autas las òbras deu Justin Larrevath dens lo jornau L’Ariel.

En partint deu pòrt de la Grana Mar e deu pont Sent-Esprit, que passaram preu Crampòt, l’arrua Borg-Nau, l’arrua Saubiòla, lo cai deus Corsaris, lo Musèu Basco e de l’Istòria de Baiona, l’arrua Marengo (on vadó lo Justin Larrevath), l’arrua deu Corsic, lo cai Galuparia, l’arrua deus Barricaires e l’anciana « Balèia deu Papa », lo Trenquet, l’arrua de las Liças, la plaça e la glèisa Sent-Andrèu, la pòrta de Mossaròlas, la Castèth-Nau, l’arrua e lo Pont Panacau, l’arrua deus Corderèrs, l’arrua Pèir Lescar, l’arrua Pelletièr, lo cai Xaho, lo pont de l’Engèni, e en bordejant Niva dinc au parcatge de Glanh.

Aqueth barri, plen de vita un còp èra, que’s torna trobar uei un chic de l’animacion passada un còp per an au parat de las hèstas de Baiona, suu truc deus darrèrs jorns de julhet o deus purmèrs jorns d’aost. Mes que’vs cau deishar córrer l’imaginacion tà enténer los barricaires qui trucavan a braç virat tà ajustar las doèlas, los mastroquèrs qui’s desplaçavan las barricas d’un chai a l’aut en las har rotlar suus pavats, los trucs, los patacs e los escarnis escambiats per quiò o per non, la ronda cridassèra de las anhetèiras, los ahups deus mèstes de barra, las cantas deus tilholèrs los sers de briaguèra… E benlèu que saunejaratz a las carrinquejadas de las arròdas de la carròça reiau capvath las arruas, e aus arrebompits de la pelòta contra lo fronton, quan, un jorn de mai de 1660, lo joen Loís lo XIVau e se’n vienó a har ua partida memorabla de jòc de pauma au trenquet de l’anciana arrua Maubèc, aperada uei l’arrua deu Trenquet.

Bon viatge au Petit Baiona de uei, en esperant qu’i enteneratz enqüèra arretrenir quauque mòt de la nòsta bèra e vielha lenga gascona.

 (C) IEO - Tots drets reservats / Tous droits réservés