Tour audio Масаляны

Любоў да Айчыны пачынаецца з любові да сваёй малой радзімы. Любіць Радзіму - значыць берагчы і ахоўваць яе, вывучаць яе гісторыю і культуру. Цікавячыся гісторыяй роднага краю, ведаючы жыццёвыя шляхі сваіх продкаў,  сучасны чалавек адчувае непарыўную сувязь са сваёй зямлёй. Тую сувязь, якая ідзе праз вякі, праз кроў і гены, тую, якую нельга патлумачыць словамі – толькі адчуць.

Знаёмства з мінулым, цяперашнім і меркаваным будучым сваёй малой радзімы, спрыяе фармаванню ў чалавека светапогляду, у які ўключана ўсведамленне сваёй прыналежнасці да вызначанай нацыі і, як следства, гонар за гэта.

У кожнага чалавека адчуванне малой Радзімы сваё: гэта ці той куток, што яму блізкі, ці той, дзе ён нарадзіўся, ці дзе прайшлі гады яго жыцця. І куды б ні закінуў чалавека лёс, ён памятае гэты куток, яго цягне туды вярнуцца, пасядзець на знаёмай лавачцы, пераскочыць праз ручаёк, прайсці па вуліцы, якая сыходзіць у далеч, дакрануцца да цяжкага валуна на ўскрайку лесу ці парку, загадаць, як у дзяцінстве, сваё самае запаветнае жаданне…Для мяне такі куток - вёска Масаляны Бераставіцкага раёна Гродненскай вобласці. Тут жывуць мае дзядулі і бабулі, тут прайшла значная частка майго дзяцінства і, хоць я і не нарадзілася тут, да гэтага месца прывязана мая душа.

Прыязджаючы ў Масаляны, размаўляючы з мясцовымі жыхарамі, вучнямі мясцовай школы, з захапленнем слухаю гісторыі далёкага і блізкага мінулага і кожны раз упэўніваюся:  вёска ў нас унікальная.