Audioguía Las arròcas de Biàrritz

Durada : 2 òras haut o baish
Tèxtes e lectura preu : Miquèu Baris (dab l'ajuda deu Bernat Dauga e deus aprenents de gascon d’Ací Gasconha)
Credit fotografic: Miquèu Baris e Bernard Dauga
Un partenariat : IEO, IEO 40, Camille Jautrou (Servici civic, IEO-FFCU)

Visita possibla en francés e en occitan (gascon)
Endé nos har saber çò que pensatz de la visita,empleatz lo nòste questionari de satisfaccion

En partint de bisa, e de la punta Sent Martin, las arròcas de Biàrrits que s'esperracan de cap au mijorn dinc a la còsta de Pèirnauton, uei aperada « la Côte des Basques ». D’on vienen donc aqueths noms ? Lo gascon qu'èra pertot… Qu’es sonque lo torisma qui a hèit modificar los noms originaus. Que’us an hicats en francés, e pro sovent dab ua consonança basca o anglesa…
Aquò e haré donc la causa mei venedora ?… On es lo respècte deus nòstes ajòus ?

----------------

Presentacion de la visita, contada preu Miquèu Baris

Ah ! Las arròcas de Biàrritz… Qu’an dit fòrt de causas sus eras. Los Bascos que se las reïvindican uei dab un haish de bonas rasons. Mes ne’s cau pas desbrombar que, au començament deu sègle XIXau, aqueth vilatjòt n’èra pas briga coneishut e n’avè pas la notorietat qui a adara. Qu’èra medish un simple vilatjòt, un ahitau gascon, lo darrèr de la longa còsta landesa de la Mar Grana, o deu « Peugue » com disèn alavetz.

Los Bascos qu’èran mei au dehens de las tèrras, dens lo País Basco interior, on trabalhavan la tèrra. Que vienèn a Biàrritz sonque un còp per an, après la batèra deu blat, tà s’enlhevar la prova e banhà’s tots curts, ad un endret qui apèran uei « la còsta deus Bascos » (que comprenen perqué), e qui lavetz n’èra pas sonque la plaja de Pèirnauton, la contraccion de Pèir-Arnauton, un petit nom fòrt de mòda d’aqueth temps.

Aqueth trabalh qu’es lo frut de las recèrcas menhadas preu monde deus cors de gascon de « Ací Gasconha », ad Anglet, que lo President (e fotografe ad aqueth parat) e n’es lo Bernat Dauga. Que me’u cau arremercejar ací per la hidança qui’m hè, com e’m cau mercejar tanben lo praube Xavièr Cenderent, un òmi desapareishut tròp lèu. 

Ací Gasconha : 27 arrua de l’Euskadi 64600 ANGLET
Corric : espacigascon@acigasconha.asso.fr
Telefone : 05 59 03 34 78

(C) IEO - Tots drets reservats / Tous droits réservés