Museum Музей-бібліятэка Сімяона Полацкага

У будынку жылога корпуса былога Богаяўленскага манастыра паміж залаў Музея беларускага кнігадрукавання размясціўся яшчэ адзін з філіялаў НПГКМЗ — Музей-бібліятэка Сімяона Полацкага.

Інтэр'ер музея-бібліятэкі аформлены на ўзор заходнееўрапейскай бібліятэкі XVII–ХVІІІ стагоддзя — кніжныя шафы, размешчаныя ў два ярусы, бюсты вучоных-філосафаў, чытальная зала і пасярэдзіне — вялікі глобус. Па-мастацку аформіў гэтую ідэю полацкі мастак Ігар Куржалаў.

Экспазіцыя асвятляе розныя перыяды жыцця і дзейнасці Сімяона Полацкага: самы ранні полацкі перыяд, гады вучобы ў Кіеве і Вільні, маскоўскі перыяд.

Асноўнае месца ў музейнай экспазіцыі адводзіцца літаратурнай і выдавецкай дзейнасці Сімяона Полацкага. У музейных вітрынах размясціліся арыгіналы яго кніг: „Жезл правления“ (1753), „Тестамент“ (1680), „Вечеря душевная“ (1683), копіі рукапісаў асветніка, яго фігурныя вершы ў стылі барока, кнігі XVII–ХVІІІ стст., а таксама працы сучасных навукоўцаў, прысвечаныя жыццю і дзейнасці славутага палачаніна.

Музей быў адкрыты 25 сакавіка 1994 года. Экспазіцыйная плошча — 134,5 кв.м. Экспануецца 145 музейных прадметаў. Акрамя таго, тут захоўваецца частка калекцыі друкаваных выданняў з фондаў НПГКМЗ і фонд навуковай бібліятэкі. Працуе чытальная зала на 10 месцаў.

У памяшканні музея-бібліятэкі праходзяць розныя прэзентацыі, сустрэчы з вядомымі паэтамі і пісьменнікамі, навуковыя канферэнцыі.